महाराष्ट्राच्या कोस्टल पोलीस दलात माजी अग्निवीरांना संधी; नौदलातील अनुभवाचा सागरी सुरक्षेसाठी होणार उपयोग
महाराष्ट्रातील माजी अग्निवीरांसाठी मुख्यमंत्री देवेंद्र फडणवीस यांनी महत्त्वाचे पाऊल उचलले आहे. भारतीय नौदलात चार वर्षांची सेवा पूर्ण केलेल्या 250 हून अधिक माजी अग्निवीरांना राज्याच्या कोस्टल पोलीस दलात थेट नियुक्ती देण्यात आली आहे. विशेष म्हणजे, या उमेदवारांना नव्याने भरती परीक्षा देण्याची आवश्यकता भासलेली नाही.
मुख्यमंत्री देवेंद्र फडणवीस यांनी शुक्रवारी नागपूर येथे या निर्णयाची माहिती दिली. सशस्त्र दलांमध्ये सेवा बजावताना अग्निवीरांनी कठोर प्रशिक्षण घेतले असून, त्यांच्याकडे शिस्त, तांत्रिक कौशल्ये आणि प्रत्यक्ष कामाचा अनुभव आहे. या अनुभवाचा उपयोग महाराष्ट्राच्या पोलीस यंत्रणेला होऊ शकतो, अशी भूमिका मुख्यमंत्री फडणवीस यांनी मांडली.
राज्य सरकारने या भरतीसाठी आवश्यक नियमांमध्ये बदल करून माजी अग्निवीरांच्या नियुक्तीचा मार्ग मोकळा केला. त्यानंतर पहिल्या टप्प्यात नौदलातील 250 हून अधिक जवानांना नियुक्तीपत्रे देण्यात आली. महाराष्ट्राला विस्तीर्ण सागरी किनारपट्टी लाभली असून, तिच्या सुरक्षेसाठी प्रशिक्षित मनुष्यबळ महत्त्वाचे आहे. नौदलातील अनुभवामुळे कोस्टल पोलीस दलाची कार्यक्षमता वाढण्यास मदत होईल, असा विश्वास मुख्यमंत्री देवेंद्र फडणवीस यांनी व्यक्त केला.
चार वर्षांची सेवा पूर्ण करणाऱ्या अग्निवीरांना राज्याच्या पोलीस दलात संधी देण्याच्या पूर्वीच्या घोषणेच्या दिशेने हे महत्त्वाचे पाऊल मानले जात आहे. या निर्णयामुळे माजी अग्निवीरांना करिअरची नवी संधी मिळण्यासोबतच राज्याच्या सागरी सुरक्षेलाही बळ मिळणार आहे.
Leave a Reply