दिल्लीतील जंतरमंतर परिसरात आंदोलनादरम्यान पोलिसांनी केलेल्या लाठीचार्जनंतर राजकीय वातावरण चांगलेच तापले असताना, महाराष्ट्राचे मुख्यमंत्री देवेंद्र फडणवीस यांनी या संपूर्ण प्रकरणावर आपली भूमिका स्पष्ट केली आहे. कायदा-सुव्यवस्था अबाधित ठेवण्यासाठी काहीवेळा कठोर निर्णय घ्यावे लागतात, असे सांगतानाच त्यांनी कोणत्याही सरकारला नागरिकांवर लाठीचार्ज करणे पसंत नसते, असेही स्पष्ट केले.
प्रसारमाध्यमांशी संवाद साधताना मुख्यमंत्री देवेंद्र फडणवीस म्हणाले की, लोकशाहीत प्रत्येक नागरिकाला आंदोलन करण्याचा अधिकार आहे. मात्र, हा अधिकार वापरताना संविधानाने घालून दिलेल्या मर्यादा आणि जबाबदाऱ्या पाळणेही तितकेच आवश्यक आहे. शांततेत आणि नियमानुसार होणाऱ्या आंदोलनाला प्रशासनाकडून सहकार्य मिळू शकते; परंतु हिंसा, तोडफोड किंवा परवानगीशिवाय कायदा हातात घेण्याचा प्रयत्न कोणत्याही परिस्थितीत स्वीकारला जाणार नाही.
दिल्लीतील आंदोलनाचा उल्लेख करताना फडणवीस यांनी ते नेतृत्वविरहित झाल्याचा दावा केला. अशा प्रकारच्या आंदोलनांमध्ये काही बाह्य घटक स्वतःचा वेगळा अजेंडा पुढे रेटण्यासाठी सहभागी होतात, असे ते म्हणाले. त्यामुळे पोलिसांवर हल्ले, सरकारी वाहनांची तोडफोड आणि तणावपूर्ण परिस्थिती निर्माण झाल्याचा उल्लेख त्यांनी केला.
मुख्यमंत्री देवेंद्र फडणवीस यांनी असेही सांगितले की, काही विद्यार्थी त्यांच्या प्रश्नांसाठी प्रामाणिकपणे आंदोलनात सहभागी झाले असतील, याबाबत शंका नाही. मात्र, या गर्दीचा फायदा घेत काही असंबंधित व्यक्तींनी अराजकता निर्माण करण्याचा प्रयत्न केल्याचा आरोप त्यांनी केला. अशा लोकांचा परीक्षांशी किंवा मूळ मागण्यांशी थेट संबंध नसून, ते केवळ परिस्थिती चिघळवण्याच्या उद्देशाने सक्रिय झाल्याचे त्यांनी म्हटले.
फडणवीस यांनी पुढे काही राजकीय पक्षांवरही अप्रत्यक्ष टीका केली. आंदोलनाच्या माध्यमातून राजकीय संधी शोधण्याचा प्रयत्न होत असल्याचा आरोप करत त्यांनी अशा प्रवृत्तींपासून सावध राहण्याचे आवाहन केले.दिल्लीतील आंदोलन आणि त्यानंतर झालेल्या पोलिस कारवाईवरून देशभरात चर्चा सुरू असतानाच, मुख्यमंत्री देवेंद्र फडणवीस यांनी कायदा-सुव्यवस्था राखण्याला सरकारचे सर्वोच्च प्राधान्य असल्याचे स्पष्ट करत, शांततापूर्ण आंदोलन आणि हिंसक कृती यामधील फरक ओळखणे गरजेचे असल्याचा संदेश दिला.
Leave a Reply