मुंबई : राज्य विधिमंडळाच्या पावसाळी अधिवेशनाच्या पूर्वसंध्येला विरोधकांनी सरकारच्या चहापान कार्यक्रमावर बहिष्कार टाकत सरकारला लक्ष्य केले असताना, मुख्यमंत्री देवेंद्र फडणवीस यांनी मात्र आक्रमक आणि मुद्देसूद भूमिका घेत विरोधकांच्या आरोपांना प्रत्युत्तर दिले. “राजकारण केल्यास तसेच उत्तर मिळेल,” असा स्पष्ट इशारा देत त्यांनी विरोधकांच्या भूमिकेवर सडकून टीका केली.
उपमुख्यमंत्री एकनाथ शिंदे आणि उपमुख्यमंत्री अजित पवार यांच्यासमवेत झालेल्या पत्रकार परिषदेत फडणवीस यांनी विरोधकांच्या पत्रकार परिषदेत कोणताही नवा मुद्दा मांडला गेला नसल्याचे सांगितले. सरकारने यापूर्वीच कार्यवाही केलेले विषयच पुन्हा मांडण्यात आल्याचा आरोप करत, जनतेच्या अपेक्षांशी संबंधित प्रश्नांवर विरोधकांचे लक्ष नसल्याची टीका त्यांनी केली.
विरोधकांनी चहापानावर बहिष्कार टाकताना सादर केलेल्या सहा पानी पत्रावरही मुख्यमंत्र्यांनी निशाणा साधला. या पत्रातील अनेक मुद्द्यांवर यापूर्वीच चर्चा झालेली असून, त्यातील मजकूर कृत्रिम बुद्धिमत्ता (AI) च्या माध्यमातून तयार करण्यात आल्याचा दावा त्यांनी केला.
शेतकरी कर्जमाफीच्या मुद्द्यावरही फडणवीस यांनी दीर्घकालीन उपायांची गरज अधोरेखित केली. २०२० मध्ये कर्जमाफी झाल्यानंतरही शेतकऱ्यांना पुन्हा कर्जमुक्तीची गरज का भासली, असा सवाल उपस्थित करत केवळ कर्जमाफी हा कायमस्वरूपी उपाय नसल्याचे त्यांनी स्पष्ट केले. शेतकऱ्यांना स्थायी दिलासा मिळावा, यासाठी व्यापक धोरणांची आवश्यकता असल्याचे त्यांनी सूचित केले.
राज्यात पावसाने उशिरा हजेरी लावल्यामुळे संभाव्य पाणीटंचाईचे संकट लक्षात घेऊन काही प्रमाणात नाराजी पत्करून पाणी उपशावर निर्बंध घालण्याचा निर्णय घेण्यात आल्याची माहितीही मुख्यमंत्र्यांनी दिली. भविष्यातील संकट टाळण्यासाठी कठोर पण आवश्यक निर्णय घेण्याची सरकारची तयारी असल्याचे यातून दिसून आले.
विरोधकांच्या टीकेला तितक्याच ठामपणे उत्तर देतानाच राज्यातील शेतकरी, पाणी व्यवस्थापन आणि महिला सक्षमीकरणासंदर्भातील निर्णयांची दिशा स्पष्ट करून मुख्यमंत्री देवेंद्र फडणवीस यांनी अधिवेशनाच्या सुरुवातीलाच सरकारचा अजेंडा ठामपणे मांडल्याचे चित्र पाहायला मिळाले.
Leave a Reply